剃头摊浪看小人书
◆殷国祥
阿拉小辰光，除脱辣弄堂里趴辣地浪刮香烟牌子、顶橄榄核或者打玻璃弹子等游戏外，看小人书也是一大乐事。
到小人书店里去看当然是要钞票个，当时个小囡大多数个辰光侪处于囊中羞涩个状态，所以只要晓得啥地方可以免费看小人书，侪勿会轻易放弃迭种机会个——喏，男小囡侪晓得有一个可以免费看小人书个好地方，就是阿拉弄堂口个剃头摊。
迭只摊头是夫妻老婆店，瘦瘦个老伯伯负责剃头，胖胖个老阿姨负责收钞票，生意好得勿得了，平常日脚去剃头一般侪是要排队个，假使碰着逢年过节，排队剃头个人就更加多了。
大人去剃头，一般侪怕排队浪费辰光，看到排队个人多，往往就回去了，等下趟人少个辰光再来。勿过对阿拉搿点小朋友来讲，勿但勿怕排队，有辰光甚至希望队能排得更长一点。为啥能？因为排队个辰光可以免费看小人书。
每趟去剃头个辰光，阿拉总归先交拨老板娘一角洋钿，然后就辣沿墙摆放个长条板凳上排排坐。摊头旁边个墙角落里有一只篮头，里向侪是小人书，排队等候个辰光可以免费翻看，迭个就好比“买鱼送葱姜”，搨着便宜了。对阿拉小朋友来讲，合算得勿得了。有人算了一笔账，假使到弄堂口个小人书摊浪向看小人书，价钿是一分洋钿看三本，假使阿拉辣剃头摊浪看满三本，就等于省下来一分洋钿，算下来就等于九折剃头，假使看了六本，就是八折剃头，真正是精神物质双丰收了。
前头讲个是大多数人，侪是按先来后到个顺序交钞票、排排坐、看小人书个。实际浪还有脑回路比较清奇个朋友，勿交钞票勿剃头，照样免费看小人书，譬如后弄堂3号亭子间里个阿庆。听到啥人要去剃头了，伊马上过来勾肩搭背，貌似热心相伴，实则另有所图。原来迭个阿庆到了剃头摊浪，辣老板娘眼皮底下假装陪客，立了排队剃头个小朋友身后，歪着脖子蹭看小人书。
阿庆个聪明劲确实让伊蹭看了勿少小人书，可是也有后遗症，离开剃头摊之后，伊个头颈往往要别筋好几天。